«

»

نوفمبر 28

Print this مقالة

الفضاء الأكثر مرونه للشباب .. المنتدى الاجتماعي العراقي

“لكيت هنا مساحة تحتوي الشباب الي بعمري وتنطيهم الفرصة انو ينفذون افكارهم الي يحبوها ويشاركون بتنظيم المجموعة بدون ما احد يكول سوو فلان شي” ..

هكذا افتتح عيسى جعفر احد متطوعي المنتدى الاجتماعي العراقي حديثه عند سؤاله عن دور المتطوعين في الاعداد للموسم الرابع من المنتدى والفرص التي يحصلون عليها لتوظيف طاقاتهم.

واضاف: “صارلي سنتين هنا بالمنتدى, بالبداية من اجيت جنت اسمع بمصطلح (الادارة الأفقية) بس بصراحه مجانت عندي فكرة شنو معنى هذا الشي, وشويه شويه من دخلت بتفاصيل الشغل, شفت انو كل واحد عنده مهاره معينه هو يكون مسؤول عن الشغله الي يكدر يبدع بيهه, ومن تنجمع مهاراتنا كل واحد بمجاله, تطلع بالنهاية الصورة الجبيرة الحلوة لاي نشاط نسوي”.

هذا ما عبره عنه عيسى وهو يحدثني في مقابلة سريعة اجريتها معه بينما كان مشغولاً في اعداد الخرائط الدلالية للموسم الرابع من المنتدى الاجتماعي العراقي. انتقلت بعدها بجوله في مقر المنتدى الذي يحب متطوعوه ان يطلقو عليه (الفورم) نسبة الى الكلمة الأنكليزية Forum, كنت ابحث بين وجوه المتطوعين المنتشرين في ارجاء المكان يقوم كل منهم بمهمه يحرص على ان يؤديها بإتقان عن سر الحافز خلف كل هذا العطاء, فوجدت نفسي جالساً عند مكتب الصديق علي صاحب منسق المنتدى الاجتماعي العراقي وانا انظر اليه بينما كان مشغولاً هو الآخر, فبادرني بالسؤال: “ها شدتسوي؟”, قلت له: “ابحث”, فقال: “عن شنو تبحث!”

قلت: “الموسم يجي ويروح, وعشرات المنظمات تشارك وآلاف الناس من الجمهور يحضرون, وتصير حوارات وانشطة وتطلع بنتائج, بس مو هوايه يعرفون شنو ديصير بالكواليس, وشلون هاي المجموعة من الشباب المتطوعين ديسوون تحضيرات حدث بهاي الضخامة, اني ابحث عن طريقة اوصل هاي الجهود للناس, وما لكيت غير قلمي وهاي الورقة”, ثم بادرت بالسؤال: “شنو الفرق بين الموسم وباقي ايام السنة بالمنتدى؟”

فأجاب علي: “بالمنتدى احنه نسوي انشطة طول السنة, اغلب الانشطة تنظمها مسارات المنتدى, وتناقش مواضيع مختلفة ابرزها اللا عنف, والحقوق الاقتصادية والاجتماعية, والبيئة والمياه, وحقوق المرأة, وحقوق الاقليات, وتمتد هاي الانشطة بأغلب مدن العراق بالأصافة لبغداد, وتتنوع بين مؤتمرات وندوات وجلسات حوارية ومهرجانات واحتفالات ووقفات تضامنية وانشطة رياضية, كل هذا يصير خلال اشهر السنة, وهذا العام سجلنا اكبر عدد من الانشطة بمعدل اربع انشطة شهرياً, نظمتها المسارات المختلفة. اما الموسم فهو الحدث السنوي الي تلتقي بي كل المنظمات والنقابات والمجاميع وتقدم انشطتها وفعالياتها بحضور عدد كبير من الجمهور, ويمثل الموسم خلاصة لمجمل اعمال المنتدى خلال السنة ومساحة لكل المجتمع المدني حتى يلتقي ويتحاور ويتبادل الافكار”.

وأضاف: “هذا الموسم رح يستمر 4 ايام, يبدي يوم الاربعاء القادم 29 تشرين الثاني, ويه مؤتمر الحوار الاجتماعي الي ينظمة مسار الحقوق الاقتصادي والاجتماعية بالمنتدى بالأضافة لمركز التضامن العمالي, واليوم الثاني الخميس 30 هو يوم الورش والندوات ورح يصير بأكاديمية بغداد للعلوم الانسانية, وكذلك اليوم الثالث الجمعة 1 كانون الاول بنفس المكان, اما اليوم الرابع رح يكون يوم السبت 2 كانون الاول, الي رح يصير بي الصبح ماراثون بغداد للسلام بشارع ابو نؤاس, وبعد الظهر مهرجان عراق آخر ممكن بحديقة شهرزاد وشهريار بأبو نؤاس”.

Permanent link to this article: http://iraqsf.org/%d8%a7%d9%84%d9%81%d8%b6%d8%a7%d8%a1-%d8%a7%d9%84%d8%a3%d9%83%d8%ab%d8%b1-%d9%85%d8%b1%d9%88%d9%86%d9%87-%d9%84%d9%84%d8%b4%d8%a8%d8%a7%d8%a8-%d8%a7%d9%84%d9%85%d9%86%d8%aa%d8%af%d9%89-%d8%a7%d9%84/